Тросьненская бітва

Тросьненская бітва 1368 году — паміж войскам ВКЛ на чале зь вялікім князем Альгердам і старажавым атрадам Маскоўскага княства.

Адбылася 21 лістапада 1368 году (у аўторак, на Ўвядзеньне; некаторыя крыніцы падаюць памылковую дату 21 сьнежня) на рацэ Тросьне. Кампанія 1368 году («первая Литовщина» маскоўскіх летапісаў) была распачата Альгердам у падтрымку саюзнага ВКЛ Цьвярскога княства. Раптоўнае зьяўленьне войска ВКЛ «в силе тяжце» з паўднёвага захаду (якое чакалася з боку Ржэвы), забясьпечанае поўнай сакрэтнасьцю руху войска, засьпела маскоўскага вялікага князя Дзьмітрыя і яго саюзьнікаў зьнянацку. Першую перамогу літоўскае войска атрымала над князем Сямёнам Дзьмітрыевічам Cтарадубскім-Крапівай на рацэ Хоўхал (левы прыток ракі Пратвы), затым — над абаленскім князем Канстанцінам Юр’евічам і наблізілася да Масквы, дзе на рацэ Тросьне (левы прыток ракі Нары) яе сустрэла «застава» на чале з ваяводамі Дзьмітрыем Мініным і Акінфам Шубам. Цяжкаўзброеная літоўская коньніца ўшчэнт разграміла лёгкую, дрэнна ўзброеную і тактычна недасьведчаную маскоўскую, абодва ваяводы і амаль усе ратнікі былі забітыя ці ўтапіліся ў Тросне. Перамога ў Тросьненскай бітве адкрыла Альгерду шлях на Маскву, трохдзённая аблога якой была, аднак, беспасьпяховай (за год да гэтага быў пабудаваны мураваны Маскоўскі Крэмль).

Тросьненская бітва — найбольш буйная перамога ВКЛ над Маскоўскім вялікім княствам у XIV стагодзьдзі.