Сяргей Мікалаевіч Румас

Нарадзіўся 1 снежня 1969 года ў Гомелі. Бацька — Мікалай Піліпавіч Румас (1947 г.н.), эканаміст, працаваў у фінансавых і кантрольна-рэвізійных органах, з 1976 года — у цэнтральным апараце Міністэрства фінансаў БССР, з 1990 года — першы намеснік Міністра фінансаў. Маці — Вольга Лявонцеўна Румас, эканамістка, працавала выкладчыцай у Мінскім фінансава-эканамічным каледжы^[1].

У 1990 годзе скончыў Яраслаўскае вышэйшае ваеннае фінансавае вучылішча па спецыяльнасці «фінансавае забеспячэнне войскаў», у 1995 годзе — Акадэмію кіравання пры Кабінеце міністраў Беларусі па спецыяльнасці «арганізацыя і кіраванне знешнеэканамічнай дзейнасці». Кандыдат эканамічных навук.

Прафесійны банкір. Пачынаў кар’еру яшчэ за савецкім часам. У прыватнасці, працаваў у спецупраўленні пры беларускай канторы Дзяржбанка СССР, якое займалася фінансаваннем Беларускай ваеннай акругі, і даслужыўся да звання капітана. Пазней некаторы час правёў у камерцыйных банках, пакуль не перайшоў у Беларусбанк. 22 верасня 2005 года кіраўнік дзяржавы Аляксандр Лукашэнка даў згоду на назначэнне Сяргея Румаса старшынёй праўлення ААТ «Белаграпрамбанк».

З 22 красавіка 2011 года — старшыня Беларускай федэрацыі футбола.

28 снежня 2010 года прызначы намеснікам прэм’ер-міністра Беларусі. Адказваў за эканамічны блок пытанняў. На гэты час прыпаў моцны валютны і фінансавы крызіс. Румас нярэдка адзначаўся прапановамі ў духу рыначнай эканомікі, але яны рэдка бывалі рэалізаваныя^[2].

31 ліпеня 2012 года звольнены з пасады намесніка прэм’ер-міністра. Атрымаў прызначэнне на пасаду старшыні праўлення ААТ «Банк развіцця Рэспублікі Беларусь».

10 кастрычніка 2017 года ўвайшоў у склад Савета па развіцці прадпрымальніцтва, кансультатыўнага органа пры Прэзідэнце Рэспублікі Беларусь^[3].

18 жніўня 2018 года прызначаны на пасаду Прэм’ер-міністра Беларусі^[4]. Паводле шэрагу экспертаў, да атрымання згоды Палаты прадстаўнікоў на гэтае прызначэнне, як таго патрабуюць артыкулы 84 і 106 Канстытуцыі, мог лічыцца толькі выконваючым абавязкі прэм’ер-міністра^[5][6]. Згода Палаты прадстаўнікоў на гэтае прызначэнне была атрымана 5 кастрычніка 2018 г., 105 дэпутатаў галасавалі «за», 1 — «супраць».

Прадстаўляючы 31 кастрычніка 2018 года ў Палаце прадстаўнікоў праграму дзейнасці ўрада на 2018—2020 гады, Сяргей Румас заявіў, што галоўная задача — павышэнне жыццёвага ўзроўню беларусаў. У дзесяць топ-задач, як іх акрэсліў Сяргей Румас, уваходзяць развіццё прадпрымальніцкага асяроддзя і стварэнне камфортных умоў вядзення бізнесу, апераджаючае развіццё сферы паслуг, фарміраванне ІТ-краіны і маштабная лічбавізацыя ўсёй эканомікі, правядзенне эфектыўнай бюджэтна-фінансавай і падатковай палітыцы, забеспячэнне ўстойліва нізкага ўзроўню інфляцыі, эфектыўнае кіраванне дзяржаўнай уласнасцю, актывізацыя знешнеэканамічнай дзейнасці, удасканальванне інвестыцыйнай палітыкі, зніжэнне міжрэгіянальнай дыферэнцыяцыі і забеспячэнне дастойных умоў жыцця насельніцтва і аплаты працы^[7].

На перыяд, калі Сяргей Румас узначальваў урад, прыпалі вострыя эканамічныя канфлікты з Расіяй, у т.л. канфлікт вакол падатковага манеўру Расіі і расійска-беларускі нафтавы канфлікт (2020). Адбылося «прасяданне» эканомікі праз пандэмію каранавірусу.

У лютым 2023 года Румас трапіў у чорны спіс Украіны^[8].

• Жонка — Жанна Леанідаўна Румас, урач-стаматолаг^[9].
• Мае чацвёра сыноў (Валерый, Максім, Сяргей, Філіп)^[9][10].

• медаль «За ўклад у стварэнне Еўразійскага эканамічнага саюза» I ступені (2015)^[11].

• Сяргей Румас назначаны намеснікам прэм’ер-міністра Беларусі // «Звязда» № 254 (26862) 29 снежня 2010

	Сяргей Мікалаевіч Румас у Вікіцытатніку
	Сяргей Мікалаевіч Румас на Вікісховішчы

• Старонка на праекце «Хто ёсць хто ў Рэспубліцы Беларусь» Архівавана 18 верасня 2014. (руск.)