Gran Premio de España de 1996

O Gran Premio de España de 1996 foi unha carreira de motor de Fórmula Un celebrada o 2 de xuño de 1996 no Circuíto de Cataluña, Barcelona. Foi a sétima carreira da tempada de Fórmula Un de 1996.

Gran Premio de España de 1996

Detalles da carreira
Carreira 7 de 16 no Campionato Mundial de Fórmula 1 de 1996.
Trazado do circuíto de Cataluña
Data	2 de xuño 1996
Nome oficial	XXXVIII Gran Premio de España
Localización	Circuíto de Cataluña, Barcelona, España
Percorrido	Circuíto permanente 4´727 km
Distancia	65 voltas, 307´114 km
Clima	Chuvia
Pole position
Piloto	Damon Hill	Williams-Renault
Tempo	1:20.650
Volta rápida
Piloto	Michael Schumacher	Ferrari
Tempo	1:45.517 na volta 14
Podio
Primeiro	Michael Schumacher	Ferrari
Segundo	Jean Alesi	Benetton-Renault
Terceiro	Jacques Villeneuve	Williams-Renault

Esta carreira, a primeira vitoria de Ferrari con Michael Schumacher, é xeralmente considerada como unha das súas mellores.^[1] Baixo unha choiva torrencial, desenvolveu unha pilotaxe impoñente e é un excelente exemplo de por que gañou o alcumo de "Regenmeister" ("Mestre da chuvia"), a pesar do seu accidente inicial e non forzado nun mollado Gran Premio de Mónaco dúas semanas antes.

Mika Salo foi descualificado por segunda vez esta tempada, por cambiar de automóbil despois de que a pista estivese baixo as ordes do director de carreira.

Damon Hill comezara a carreira desde a pole position, pero caeu a oitavo despois de trompear dúas veces nas primeiras voltas, antes de que outro trompo con toque na parede do pit na volta 12 o fixera abandonar a carreira. Schumacher recuperouse dunha mala saída para tomar o liderado de Villeneuve na volta 13 e, a partir de entón, dominou a carreira, superando en tres segundos por volta ao resto dos participantes.^[1][2]

Rubens Barrichello, que marchaba en segundo lugar despois de que Jacques Villeneuve e Alesi fixeron as súas paradas en boxes, tivo unha boa actuación nesta carreira, pero viuse forzado a retirarse a falta de 20 voltas tras un problema de embrague. Na volta anterior, Gerhard Berger se retirara co seu Benetton logo de trompear cando marchaba cuarto lugar ao intentar dobrar ao Ligier de Pedro Diniz.

Despois dunha carreira sen incidentes, Heinz-Harald Frentzen terminou na cuarta posición, mentres que Mika Häkkinen quedou quinto despois de sobrevivir a un trompo na fase final da carreira. Jos Verstappen, quinto tras as retiradas de Barrichello e Berger, estrelouse contra a barreira de pneumáticos cando quedaban 12 voltas, garantindo a Diniz o seu primeiro punto na Fórmula Un, xa que só quedaron seis pilotos na carreira. Sen máis retiradas, Diniz levou o seu coche a meta no sexto lugar, tras pilotar a un ritmo máis cauteloso que o viu perder dúas voltas respecto aos pilotos gañadores ao final.