જેકી શ્રોફ

જેકી શ્રોફનો જન્મ ૧ ફેબ્રુઆરી, ૧૯૫૭ના રોજ એક ગુજરાતી કુટુંબમાં થયો હતો. એમનું વાસ્તવિક નામ જયકિશન કાકુભાઈ શ્રોફ છે, એમના પિતાનું નામ કાકાભાઈ હરિભાઈ શ્રોફ છે અને માતાનું નામ રીટા શ્રોફ છે. તેઓ મુંબઈ શહેરના વાલકેશ્વર વિસ્તારમાં તીન બત્તી ખાતે એક ચાલીમાં રહેતા હતા. ફિલ્મોમાં આવતાં પહેલાં તેમણે કેટલીક ધંધાદારી જાહેરખબરોમાં એક મોડેલ તરીકે કામ કર્યું હતું. તેમને સૌ પ્રથમ દેવઆનંદની ફિલ્મ સ્વામી દાદામાં એક નાની ભૂમિકા મળી હતી. ૧૯૮૩ના વર્ષમાં નિર્માતા દિગ્દર્શક સુભાષ ઘાઈએ તેમને ફિલ્મ હીરોમાં અગ્રણી ભૂમિકા પૂરી પાડવાનું કાર્ય સોંપ્યું. આ ફિલ્મ ખૂબ જ સફળ થઈ અને તેઓ રાતોરાત મોટા અભિનેતા (સ્ટાર) બની ગયા. ૮૦ના દાયકામાં તેમણે તેમની પ્રેમિકા આયશા દત્ત સાથે લગ્ન કર્યાં. આયશા પછીથી એક ફિલ્મની નિર્માત્રી પણ બની હતી. તેઓ બંને જેકી શ્રોફ એન્ટરટેઇનમેન્ટ લિ. નામની મીડિયા કંપની પણ ચલાવે છે. તેમના સોની ટીવીમાં પણ ૧૦% શેર હતા, જે તેમણે ૨૦૧૨ના વર્ષમાં વેચી દીધા હતા. તેમને બે બાળકો છે, જેમાં પુત્રનું નામ ટાઇગર (જય હેમંત) અને પુત્રીનું નામ કૃષ્ણા છે.

• ૧૯૯૦ વિજેતા: ફિલ્મફેર સર્વશ્રેષ્ઠ અભિનેતા પુરસ્કાર - પરિંદા
• ૧૯૯૪ નામાંકિત: ફિલ્મફેર સર્વશ્રેષ્ઠ અભિનેતા પુરસ્કાર - ગર્દિશ
• ૧૯૯૪ નામાંકિત: ફિલ્મફેર સર્વશ્રેષ્ઠ સહઅભિનેતા પુરસ્કાર - ખલનાયક
• ૧૯૯૫ વિજેતા: ફિલ્મફેર સર્વશ્રેષ્ઠ સહઅભિનેતા પુરસ્કાર - ૧૯૪૨ એ લવ સ્ટોરી
• ૧૯૯૬ વિજેતા: ફિલ્મફેર સર્વશ્રેષ્ઠ સહઅભિનેતા પુરસ્કાર - રંગીલા
• ૧૯૯૭ નામાંકિત: ફિલ્મફેર સર્વશ્રેષ્ઠ સહઅભિનેતા પુરસ્કાર - અગ્નિસાક્ષી
• ૨૦૦૧ નામાંકિત: ફિલ્મફેર સર્વશ્રેષ્ઠ ખલનાયક પુરસ્કાર - મિશન કાશ્મીર
• ૨૦૦૨ નામાંકિત: ફિલ્મફેર સર્વશ્રેષ્ઠ સહઅભિનેતા પુરસ્કાર - યાદેં
• ૨૦૦૩ નામાંકિત: ફિલ્મફેર સર્વશ્રેષ્ઠ સહઅભિનેતા પુરસ્કાર - દેવદાસ
• ૨૦૦૭ વિશેષ ગૌરવ નિર્ણાયક સમિતિ પુરસ્કાર (વિશેષ ઑનર જ્યુરી એવોર્ડ) હિન્દી સિનેમા માટે ઉત્તમ યોગદાન માટે
• ૨૦૧૪ વિજેતા: ઉત્તમ પરિધાન માટે GQ સામાયિક તરફથી