ജൂലിയ റോബർട്ട്സ്
ഒരു അമേരിക്കൻ അഭിനേത്രിയാണ് ജൂലിയ ഫിയോന റോബർട്ട്സ് (ജനനം: ഒക്റ്റോബർ 28, 1967). 1990-ലെ പ്രെറ്റി വുമൺ എന്ന ചിത്രം വൻവിജയമായതോടെ ഹോളിവുഡ് താരപദവിയിലെത്തി. എറിൻ ബ്രോക്കോവിച്ച് (2000) എന്ന ചിത്രത്തിലൂടെ മികച്ച നടിക്കുള്ള അക്കാഡമി അവാർഡ് നേടി. ബോക്സ് ഓഫീസിൽ ഏറ്റവും വിജയിച്ച നായികമാരിൽ ഒരാളാണ് ജൂലിയ[2] 2001-ൽ ലേഡീസ് ഹോം ജേർണൽ തയ്യാറാക്കിയ അമേരിക്കയിലെ ഏറ്റവും ശക്തരായ വനിതകളുടെ പട്ടികയിൽ 11-ആമതെത്തി[3]. ഒരു കാലഘട്ടത്തിൽ ലോകത്തിലെ തന്നെ ഏറ്റവുമധികം പ്രതിഫലം നേടുന്ന അഭിനേത്രിയായിരുന്നു. 2003-ൽ മോണോലിസ സ്മൈൽ എന്ന ചിത്രത്തിന് രണ്ടര കോടി ഡോളർ പ്രതിഫലം വാങ്ങി റെക്കോർഡിട്ടു. 2010-ലെ കണക്കനുസരിച്ച് 14 കോടി ഡോളറാണ് ഇവരുടെ ആസ്തി.
ജൂലിയ റോബർട്ട്സ് | |
|---|---|
 ജൂലിയ റോബർട്ട്സ്, 2011 | |
| ജനനം | ജൂലിയ ഫിയോന റോബർട്ട്സ് ഒക്ടോബർ 28, 1967 അറ്റ്ലാന്റ, ജോർജ്ജിയ, യു.എസ്.എ. |
| തൊഴിൽ | അഭിനേത്രി |
| സജീവ കാലം | 1987–തുടരുന്നു |
| ജീവിതപങ്കാളി(കൾ) | ലിലി ലവെറ്റ് (1993–1995) ഡാനിയേൽ മോഡെർ (2002–present) |
| കുട്ടികൾ | 3 |
| കുടുംബം | എറിക് റോബർട്ട്സ് (സഹോദരൻ) ലിസ റോബർട്ട്സ്(സഹോദരി) |
ആദ്യകാല ജീവിതം
തിരുത്തുകബെറ്റി ലൂ - വാൾട്ടർ റോബർട്ട്സ് ദമ്പതികളുടെ മകളായി ജോർജ്ജിയയിലെ അറ്റ്ലാന്റയിൽ ജനിച്ചു. പിതാവ് ബാപ്റ്റിസ്റ്റും മാതാവ് റോമൻ കത്തോലിക്കാ വിശ്വാസിയുമായിരുന്നു. കത്തോലിക്ക വിശ്വാസത്തിലാണ് ജൂലിയ വളർന്നത്. അഭിനേതാക്കളും നാടകപ്രവർത്തകരുമായിരുന്ന മാതാപിതാക്കൾ ജോർജ്ജിയയിൽ ഒരു അഭിനയക്കളരി നടത്തിയിരുന്നു. സഹോദരൻ എറിക് റോബർട്ട്സ്, സഹോദരി ലിസാ റോബർട്ട്സ് ഗില്ലൻ എന്നിവരും അഭിനേതാക്കളാണ്.
1972-ൽ ജൂലിയയുടെ മാതാപിതാക്കൾ വിവാഹമോചിതരായി. ജൂലിയയുടെ പത്താം വയസ്സിൽ പിതാവ് കാൻസർ പിടിപെട്ട് മരിച്ചു. സ്മിർനയിലെ ഫിറ്റ്സ്‌ഹ്യൂ ലീ എലമെന്ററി സ്കൂൾ, ഗ്രിഫിൻ മിഡിൽ സ്കൂൾ, കാംപ്ബെൽ ഹൈസ്കൂൾ എന്നിവിടങ്ങളിലായിരുന്നു വിദ്യാഭ്യാസം. സ്കൂളിലെ ബാന്റിൽ ക്ലാർനെറ്റ് വായിച്ചിരുന്നു. ഹൈസ്കൂൾ പാസ്സായ ശേഷം അഭിനയജീവിതം ലക്ഷ്യമാക്കി ന്യൂയോർക്കിലേക്ക് തിരിച്ചു. അവിടെ ക്ലിക്ക് മോഡലിംഗ് ഏജൻസിയുമായി കരാറിലേർപ്പെടുകയും അഭിനയക്ലാസ്സുകളിൽ ചേരുകയും ചെയ്തു.
അഭിനയജീവിതം
തിരുത്തുക1987-ൽ ക്രൈം സ്റ്റോറി എന്ന ടെലിവിഷൻ പരമ്പരയുടെ ദി സർവൈവർ എന്ന എപ്പിസോഡിൽ അഭിനയിച്ചു. 1988 ഫെബ്രുവരി 12-ന് റിലീസ് ചെയ്ത സാറ്റിസ്ഫാക്ഷൻ എന്ന ചിത്രത്തിലൂടെയാണ് ആദ്യമായി വെള്ളിത്തിരയിലെത്തിയത്. (1987-ൽ ചിത്രീകരിച്ച എന്ന ചിത്രത്തിൽ സഹോദരൻ എറിക്കിനോടൊപ്പം ഒരു ചെറിയ വേഷത്തിലഭ്നയിച്ചിരുന്നുവെങ്കിലും, ആ ചിത്രം റിലീസ് ചെയ്തത് 1989-ൽ മാത്രമാണ്.) മിസ്റ്റിക്ക് പിസ(1988) എന്ന ചിത്രത്തിലെ പ്രകടനത്തിലൂടെ പ്രേക്ഷകശ്രദ്ധ നേടി. 1989-ൽ സ്റ്റീൽ മാഗ്നോളിയാസ് എന്ന ചിത്രത്തിലൂടെ തന്റെ ആദ്യത്തെ ഗോൾഡൻ ഗ്ലോബ് അവാർഡും(മികച്ച സഹനടി) ഓസ്ക്കാർ നാമനിർദ്ദേശവും(മികച്ച സഹനടി) നേടി.
1990-ൽ പുറത്തിറങ്ങിയ പ്രെറ്റി വുമൺ എന്ന ചിത്രത്തിലൂടെ അന്താരാഷ്ട്രതലത്തിൽ ശ്രദ്ധിക്കപ്പെട്ടു. റിച്ചാർഡ് ഗിയറിനോടൊപ്പം ചെയ്ത ആ ചിത്രത്തിലെ കോൾ ഗേളിന്റെ വേഷം അക്കാലത്തെ പല നായികനടിമാരും തിരസ്ക്കരിച്ചതായിരുന്നു.[4] തുടർന്ന് ഒട്ടനവധി ഹിറ്റ് ചിത്രങ്ങളിലഭിനയിക്കുകയും ഹോളിവുഡിലെ ഒന്നാം നിര നായികയാകുകയും ചെയ്തു. 2000-ത്തിൽ എറിൻ ബ്രോക്കോവിച്ച്എറിൻ ബ്രോക്കോവിച്ചിന്റെ ജീവിതത്തെ ആസ്പദമാക്കി അതേ പേരിൽ നിർമ്മിച്ച ചിത്രത്തിലെ ടൈറ്റിൽ റോൾ ആദ്യമായി ജൂലിയ റോബർട്ട്സിന് മികച്ച നടിക്കുള്ള ഓസ്ക്കാർ അവാർഡ് നേടിക്കൊടുത്തു.
2009-ൽ ഈറ്റ്, പ്രേ, ലവ് എന്ന ചിത്രത്തിൽ അഭിനയിക്കുവാൻ ഇന്ത്യയിലെത്തിയ ജൂലിയ റോബർട്ട്സ് ഹിന്ദുമതം സ്വീകരിച്ചു.[1]
അവാർഡുകൾ
തിരുത്തുക| വർഷം | ചിത്രം | അവാർഡ് |
|---|---|---|
| 1989 | സ്റ്റീൽ മാഗ്നോളിയാസ് | മികച്ച സഹനടിക്കുള്ള ഗോൾഡൻ ഗ്ലോബ് അവാർഡ് |
| 1990 | പ്രെറ്റി വുമൺ | ഇഷ്ടനടിക്കുള്ള നിക്കലോഡിയോൺ കിഡ്സ് ചോയ്സ് അവാർഡ് |
| 1990 | പ്രെറ്റി വുമൺ | മികച്ച നടിക്കുള്ള ഗോൾഡൻ ഗ്ലോബ് അവാർഡ്(മ്യൂസിക്കൽ/കോമഡി) |
| 1994 | പ്രീറ്റ്-എ-പോർട്ടർ | മികച്ച കാസ്റ്റ് - നാഷണൽ ബോർഡ് ഓഫ് റിവ്യൂ അവാർഡ് |
| 1997 | കോൺസ്പിറസി തിയറി | ഇഷ്ടനടിക്കുള്ള ബ്ലോക്ക്ബസ്റ്റർ എന്റർടെയ്ന്മെന്റ് അവാർഡ്(സസ്പെൻസ്) |
| 1997 | മൈ ബെസ്റ്റ് ഫ്രണ്ട്സ് വെഡ്ഡിംഗ് | ഇഷ്ടനടിക്കുള്ള ബ്ലോക്ക്ബസ്റ്റർ എന്റർടെയ്ന്മെന്റ് അവാർഡ്(കോമഡി) |
| 1998 | സ്റ്റെപ്പ്മോം | ഇഷ്ടനടിക്കുള്ള ബ്ലോക്ക്ബസ്റ്റർ എന്റർടെയ്ന്മെന്റ് അവാർഡ്(ഡ്രാമ) |
| 2000 | എറിൻ ബ്രോക്കോവിച്ച് | മികച്ച നടിക്കുള്ള ഓസ്ക്കാർ അവാർഡ് |
| 2000 | എറിൻ ബ്രോക്കോവിച്ച് | മികച്ച നടിക്കുള്ള ബാഫ്റ്റ അവാർഡ് |
| 2000 | എറിൻ ബ്രോക്കോവിച്ച് | മികച്ച നടിക്കുള്ള ബ്രോഡ്കാസ്റ്റ് ഫിലിം ക്രിട്ടിക്സ് അസ്സോസിയേഷൻ അവാർഡ് |
| 2000 | എറിൻ ബ്രോക്കോവിച്ച് | ഇഷ്ടനടിക്കുള്ള ബ്ലോക്ക്ബസ്റ്റർ എന്റർടെയ്ന്മെന്റ് അവാർഡ്(ഡ്രാമ) |
| 2000 | എറിൻ ബ്രോക്കോവിച്ച് | മികച്ച നടിക്കുള്ള എമ്പയർ അവാർഡ് |
| 2000 | എറിൻ ബ്രോക്കോവിച്ച് | മികച്ച നടിക്കുള്ള ഗോൾഡൻ ഗ്ലോബ് അവാർഡ്(ഡ്രാമ) |
| 2000 | എറിൻ ബ്രോക്കോവിച്ച് | മികച്ച നടിക്കുള്ള ലണ്ടൻ ഫിലിം ക്രിട്ടിക്സ് അവാർഡ് |
| 2000 | എറിൻ ബ്രോക്കോവിച്ച് | മികച്ച നടിക്കുള്ള ലോസ് ആഞ്ചലസ് ഫിലിം ക്രിട്ടിക്സ് അവാർഡ് |
| 2000 | എറിൻ ബ്രോക്കോവിച്ച് | മികച്ച നടിക്കുള്ള എം.ടി.വി. മൂവി അവാർഡ് |
| 2000 | എറിൻ ബ്രോക്കോവിച്ച് | മികച്ച നടിക്കുള്ള നാഷണൽ ബോർഡ് ഓഫ് റിവ്യൂ അവാർഡ് |
| 2000 | എറിൻ ബ്രോക്കോവിച്ച് | മികച്ച നടിക്കുള്ള സാൻ ഡിയേഗോ ഫിലിം ക്രിട്ടിക്സ് അവാർഡ് |
| 2000 | എറിൻ ബ്രോക്കോവിച്ച് | മികച്ച നടിക്കുള്ള സ്ക്രീൻ ആക്റ്റേഴ്സ് ഗിൽഡ് അവാർഡ് |
| 2000 | എറിൻ ബ്രോക്കോവിച്ച് | മികച്ച നടിക്കുള്ള ടീൻ ചോയ്സ് അവാർഡ് |
| 2004 | ക്ലോസർ | മികച്ച കാസ്റ്റ് - നാഷണൽ ബോർഡ് ഓഫ് റിവ്യൂ അവാർഡ് |
അവലംബം
തിരുത്തുക- ↑ 1.0 1.1 Blake, Heidi (August 5, 2010). "Julia Roberts: I'm a Hindu". The Daily Telegraph. London.
- ↑ ബോക്സോഫീസ്മോജോ.കോം
- ↑ Patel, Milan (August 10, 2010). "Julia Roberts Converts to Hinduism - Now Julia is Hindu". Yahoo voices. Archived from the original on 2013-01-17. Retrieved June 13, 2012.
- ↑ "Pretty Woman: 20th anniversary re-release". Total Film. Future Publishing Limited. January 25, 2010. Retrieved July 20, 2011.