തൃശ്ശൂർ കോർപ്പറേഷൻ

കേരളത്തിലെ ആറ് കോർപ്പറേഷനുകളിൽ ഒന്നാണ് തൃശ്ശൂർ കോർപ്പറേഷൻ. തൃശൂർ കോർപ്പറേഷന്റെ വിസ്തൃതി 101.42 ചതുരശ്രകിലോമീറ്റർ ആണ്. 2000 ഒക്ടോബർ 1-നാണ് കോർപ്പറേഷൻ രൂപം കൊണ്ടത്^[1].

തൃശ്ശൂർ കോർപ്പറേഷൻ
വിഭാഗം
തരം	മുനിസിപ്പൽ കോർപ്പറേഷൻ
നേതൃത്വം
മേയർ	എം.കെ. വർഗ്ഗീസ്
സഭ കൂടുന്ന ഇടം
മുൻസിപ്പൽ കോർപ്പറേഷൻ കെട്ടിടം, തൃശ്ശൂർ
വെബ്സൈറ്റ്
corporationofthrissur.org

കേരളത്തിലെ മറ്റ് കോർപ്പറേഷനുകൾ തിരുവനന്തപുരം, കൊല്ലം, കൊച്ചി, കോഴിക്കോട്, കണ്ണൂർ എന്നിവയാണ്.

ആദ്യകാലത്ത് ഒരു താലൂക്ക് ആസ്ഥാനം മാത്രമായിരുന്ന തൃശ്ശൂർ പിന്നീട് കൊച്ചി രാജ്യത്തിന്റെ വടക്കൻ മേഖലയുടെ ആസ്ഥാനമായി. 1921-ലാണ് തൃശ്ശൂർ മുനിസിപ്പാലിറ്റി രൂപം കൊണ്ടത്. അതിനുമുമ്പ് ഒരു അർബൻ കൗൺസിൽ ഇവിടെ രൂപം കൊണ്ടിരുന്നു. 1967-ൽ കൊച്ചി കോർപ്പറേഷൻ രൂപവത്കരിച്ചശേഷമാണ് ജനസാന്ദ്രത കൂടിയ പട്ടണങ്ങളായ തൃശ്ശൂരും കൊല്ലവും കോർപ്പറേഷനുകളാക്കണമെന്ന ആവശ്യം ഉയർന്നുവന്നത്. 1998 ജൂലൈ 15-ന് പുറത്തിറക്കിയ പ്രത്യേക അറിയിപ്പിൽ തൃശ്ശൂർ, കൊല്ലം മുനിസിപ്പാലിറ്റികളെ കോർപ്പറേഷനുകളാക്കി ഉയർത്താൻ തീരുമാനിയ്ക്കുകയുണ്ടായി. തൃശ്ശൂർ മുനിസിപ്പാലിറ്റിയ്ക്കൊപ്പം അയ്യന്തോൾ, വിൽവട്ടം, ഒല്ലൂക്കര, കൂർക്കഞ്ചേരി, ഒല്ലൂർ പഞ്ചായത്തുകൾ പൂർണ്ണമായും നടത്തറ, കോലഴി പഞ്ചായത്തുകൾ ഭാഗികമായും കൂട്ടിച്ചേർത്താണ് കോർപ്പറേഷൻ രൂപം കൊണ്ടത്. 2000-ൽ നടന്ന തിരഞ്ഞെടുപ്പിനുശേഷം കോൺഗ്രസ് നേതാവായ ജോസ് കാട്ടൂക്കാരൻ കോർപ്പറേഷന്റെ ആദ്യ മേയറായി. മുൻ കോൺഗ്രസ് നേതാവും ഇടതുപക്ഷ വിമതനുമായ എം.കെ. വർഗ്ഗീസാണ് ഇപ്പോഴത്തെ തൃശ്ശൂർ മേയർ^[2].

തൃശ്ശൂർ കോർപ്പറേഷൻ