Meitnerium

Meitnerium is en cheemsch Element, dat blots künstlich vörkummt. Dat Element, dat to de Transactinoiden tellt, hett dat Atomteken Mt un de Atomtall 109. De Naam weer to Ehren vun de öösterrieksch-sweedschen Physikerin Lise Meitner utwählt, de sik op dat Rebeet vun de Karnphysik en groten Roop maakt hett.

Historie

Meitnerium is 1982 bi de Sellschop för Sworionenforschen (GSI) in Darmstadt to’n eersten mol tüügt worrn. Dormols – un denn noch mol in’n Februar 1988 – weer Wismut mit Iesen beschaten worrn, wobi dat Isotop ²⁶⁶Mt rutkamen is. Dat Element hett toeerst den vörlöpigen Naam Unnilennium (Teken Une) kregen un weer ok as Eka-Iridium betekent. De hüütige Naam is 1997 fastleggt worrn.

Egenschoppen

Dat Element Meitnerium gifft dat blots künstlich tüggt, man de bit hüüt bekannten Isotopen sünd all nich lang bestännig. Bit vundaag weern acht Isotopen funnen, de all radioaktiv sünd un vör allen dör α-Verfall wedder tonichten gaht. Wegen den gauen Verfall is över de cheemschen Egenschoppen vun dat Element nich veel bekannt. Forschers gaht dorvun ut, dat Meitnerium sik as en Metall verholen deit un in grote Mengden en sülvergrau Utsehn hett^[1].

Borns

↑ Meitnerium (Mt) — Periodensystem der Elemente (PSE); afropen an’n 27. Juli 2018

Weblenken

Meitnerium. Mehr Biller, Videos oder Audiodateien to’t Thema gifft dat bi Wikimedia Commons.

Wiktionary: Meitnerium – Bedüdensverklaren, Woortherkamen, Synonymen, Översetten

Nuklidkoort bi’t National Nuclear Data Center

[1] Meitnerium (Mt) — Periodensystem der Elemente (PSE); afropen an’n 27. Juli 2018

[1]